Á forsíðum bæði Morgunblaðsins og Fréttablaðsins í dag eru fréttir, sem geta bent til þess að tilefni sé til meiri bjartsýni um endurreisn efnahags- og atvinnulífs en almennt hefur verið til staðar.

Fyrirsögnin á forsíðu Morgunblaðsins er:

"Þúsundir bókana til Íslands". Þar kemur fram hjá Hallgrími Lárussyni, framkvæmdastjóra Snælands Grímssonar að þúsundir brezkra ferðamanna hafi bókað ferðir til Íslands næsta vetur.

Fyrirsögnin á forsíðu Fréttablaðsins er:

"Finna fyrir viðspyrnu á fasteignamarkaði". Þar er haft eftir Ásdísi Ósk Valsdóttur, fasteignasala hjá Húsaskjóli, að eftir að tilslakanir hafi verið kynntar  á samkomubanni, hafi áhrifin verið eins og stífla hafi brostið og síminn byrjaði að hringja.

Það er auðvitað hugsanlegt að of mikil svartsýni hafi ríkt um framhaldið og vonandi er það svo.