New York Times birtir daglega litakort af heimsbyggðinni, þar sem sjá má stöðuna á kórónuveirunni eftir löndum. Skv. því korti standa Ísland og Grænland bezt allra Norðurlanda en Færeyjar sjást að vísu ekki á kortinu. Svíþjóð stendur hins vegar langverst, sem hlýtur að vera mikið umhugsunarefni fyrir Svía.

Skv. kortinu eru Bretar og Írar, Spánverjar og Portúgalar og Holland og Belgía og Eystrasaltsríkin í sömu stöðu og Svíar.

Vafalaust er skýringin að einhverju leyti sú, að hvorki við né Grænlendingar eigum "landamæri" að öðrum ríkjum en að auki fer tæpast á milli mála, að hér hafa sóttvarnir tekizt vel.

Þessi góð staða okkar er líka sterk efnisleg rök fyrir því að herða eftirlit á því sem í daglegu tali er kallað "landamæri" en í gamla daga var það orð notað um markalínur á milli landa á meginlöndum.