Líklegt er að átök séu framundan á þessu ári um stöðu Skotlands í "Hinu sameinaða konungsdæmi" á Bretlandseyjum og jafnvel Norður-Írlands líka.

Í vor fara þingkosningar fram í Skotlandi og í þeim má búast við að skozkir þjóðernissinnar fari fram á umboð skozkra kjósenda til að efna til þjóðaratkvæðis um sjálfstæði Skotlands, að því er fram kemur á RÚV. 

Boris Johnson hefur að vísu talað á þann veg, að svo verði ekki en erfitt er að sjá, að hann geti nokkru um það ráðið, fái skozkir þjóðernissinnar meirihluta á skozka þinginu og umboð til að efna til þjóðaratkvæðagreiðslu um málið.

Af brezkum fjölmiðlum má ráða að órói sé líka á Norður-Írlandi og að þar geti líka dregið til tíðinda, þ.e. sameining við írska lýðveldið.

Slík breyting á Bretlandseyjum mundi hafa mikil áhrif. Það er að vísu langt um liðið frá því að Bretar misstu stöðu sína sem stórveldi á heimsbyggðinni, þótt margir þeirra neiti enn að horfast í augu við þann veruleika. Það var orðið ljóst í Súez-deilunni 1956.

En verði lokapunkturinn sá, að litla England standi eitt eftir verður grundvallarbreyting á stöðu mála í okkar heimshluta en um leið ástæða til að leggja aukna rækt við tengsl okkar við Skota enda eiga þessar tvær þjóðir margvíslegra sameiginlegra hagsmuna að gæta hér í Norður-Atlantshafi.