Það er óróleiki á lyfjamörkuðum. Í gær lýstu lyfjayfirvöld í Þýzkalandi þeirri skoðun að það skorti upplýsingar um áhrif bóluefnis AstraZeneca á eldra fólk að því er fram kemur hjá þýzku fréttastofunni Deutsche-Welle. Þess vegna ætti einungis að gefa það lyf fólki, sem væri 64 ára og yngra.

Þetta er niðurstaða nefndar sérfræðinga, sem þýzka heilbrigðisráðuneytið hefur opinberað. Þessari niðurstöðu hafa bæði fyrirtækið sjálft og Boris Johnson, forsætisráðherra Breta mótmælt.

Í fyrradag, miðvikudag, lýsti Evrópusambandið óánægju  með fyrirtækið og sakaði það um að standa ekki við samninga um afhendingu bóluefna.

En jafnframt viðurkenndu þýzk heilbrigðisyfirvöld að þau stæðu frammi fyrir skorti á bóluefnum fram í apríl. Gert er ráð fyrir fundi á mánudag á milli Angelu Merkel,kanslara Þýzkalands, leiðandi ráðherra í 16 sambandsríkjum Þýzkalands og helztu forstjóra lyfjafyrirtækja.

Hver er afstaða lyfjayfirvalda hér til bóluefnis AstraZeneca?